Qarzingiz ko’payib, stressga tushayotgan bo’lsangiz “Qor uyumi” usuli (Snowball Method) sinab ko’ring. Bu qarzdorning qarzlarni to‘lash strategiyasi hisoblanadi.
Bu usul psixologik nuqtayi nazardan samarali, chunki u rivojlanishni tezroq ko‘rish va motivatsiyani saqlab qolish imkonini beradi.
“Qor uyumi” usuli qanday ishlaydi?
Usul o‘z nomini tog‘dan dumalab tushayotganda kattalashib boradigan kichik qorga o‘xshatish orqali olgan. To‘lovlar bilan ham shunday bo‘ladi: avval kichik kreditlar yopiladi, keyin kattaroq kreditlar yopiladi, oylik to‘lovlar summasi ko‘payib, qarzlardan qutulish jarayoni tezlashadi.
“Qor uyumi” usulini qo‘llash algoritmi
- Barcha qarzlar ro‘yxatini tuzing. Mavjud barcha kreditlarni ko‘rsating (ipoteka, avtokredit, kredit kartalari, onlayn mikroqarzlar va boshqalar).
- Har bir kredit bo‘yicha qarz miqdori va minimal to‘lovni yozing. Qarz qoldig‘ining o‘sishiga qarab (eng kichigidan eng kattasiga qarab) tartiblang.
- Barcha qarzlar uchun minimal to‘lovlarni amalga oshiring. Jarimalar va kechikishlarning oldini olish uchun barcha kreditlar bo‘yicha minimal to‘lovlarni amalga oshiring.
Eng kichik qarzni imkon qadar tezroq to‘lang. Barcha qo‘shimcha pullarni (bonuslar, qo‘shimcha ish haqi, tejamkorlik) eng kichik kreditni yopishga yo‘naltiring.
Bu qarz yopilgach, unga ketgan mablag‘ keyingi kredit to‘lovlariga qo‘shiladi.
Barcha qarzlar to‘lanmaguncha jarayonni to`xtatmang. Birinchi kredit yopilgandan so‘ng, bo‘sh qolgan barcha mablag‘ni ro‘yxatdagi keyingi qarzga yo‘naltiring.
Har bir yangi yopilgan kredit bilan to‘lovlar miqdori qor uyumi kabi kattalashib borishini ko’rishingiz mumkin.
Vaziyat:
Nosirda bir nechta qarzlar bor edi:
- Do‘stidan qarz — 500 ming so‘m
- Kredit karta — 1 mln. so‘m
- Onlayn mikroqarz — 10 mln. so‘m
- Avtokredit — 100 mln. so‘m
“Qor uyumi” usulidan foydalanib, u birinchi navbatda kreditlar sonini kamaytirish orqali eng kichik qarzni – 500 ming so‘mni yopishga qaror qildi. Shundan so‘ng, u ilgari bu qarz uchun sarflagan pullarini kredit kartasi to‘loviga qo‘shdi. Uni to‘lagach, u bo‘sh qolgan barcha mablag‘larni onlayn mikroqarzga yo‘naltirdi.
Nosir asta-sekin eng kichigidan tortib eng kattasigacha bo‘lgan barcha qarzlarini yopdi. Ushbu usul tufayli u har bir bosqichda kichik g‘alabalarni his qildi, bu esa uni to‘lovlarni davom ettirishga va moliyaviy erkinlikka tezroq erishishga undadi.
